Mahimong malangan ang pagbalik sa Pilipinas sa gitaktak nga mayor sa Bamban, Tarlac nga si Alice Guo. Kini tungod sa usa ka hangyo gikan sa gobyerno sa Indonesia alang sa usa ka prisoner swap.
Sumala ni Justice Secretary Crispin Remulla, buot sa mga awtoridad sa Indonesia nga ibaylo si Guo sa usa ka high-profile drug suspect nga si Gregor Johan Haas, kinsa nasikop niadtong Mayo 15 sa Bogo, Cebu, human nagpagawas og red notice base sa criminal complaint ang International Criminal Police Organization (Interpol) nga gisang-at batok kaniya sa mga awtoridad sa Indonesia.
Matud ni Remulla nga ang prisoners swap maoy makapalisud sa proseso sa pagpabalik kang Guo sa Pilipinas. Kahibaloan nga dili pa piniriso si Guo sa Pilipinas. Ang giatubang niini nga reklamo mao ang contempt order gikan sa senado nga miresulta sa pagpagawas sa arrest order.
Ang imbestigasyon kaniya nanukad sa isyu sa iyang identidad ug sa posibleng kalambigitan sa mga operasyon sa POGO.
Wala pay kaso nga gisang-at ang korte batok kang Guo.
