Giklaro ni Atty. Michael Wesley Poa nga dili awtomatikong dad-on sa depensa ngadto sa Supreme Court ang mga isyung mogawas atol sa impeachment proceedings batok kang Vice President Sara Duterte.
Sumala kang Poa, ilang tan-awon una kung ang usa ka isyu kay justiciable o mahimong resolbahon sa Korte Suprema, ug kung kini igo o tukma na ang panahon aron isaka sa maong korte.
Matod niya, magdepende kini sa sitwasyon ug sa assessment sa depensa kung gikinahanglan ba ug adunay igo nga basehan aron mangayo og interbensyon gikan sa Supreme Court.
Dugang pa ni Poa nga dili nila gamiton ang pag-sang-at sa Supreme Court aron samokon o langanon ang impeachment proceedings.
Matod pa niya, dili usab nila gustong dugangan ang palas-anon sa Korte Suprema pinaagi sa mga isyu nga walay igo nga legal nga basehan.
