Gipanghimakak ni Pangulong Ferdinand Marcos Jr. nga usa lamang ka ‘staged drama’ ang pagdakop sa iyang ig-agaw nga si kanhi House Speaker ug Leyte Rep. Martin Romualdez may kalabotan sa kontrobersyal nga P7.4 Billion nga plunder case.
Matud ni Marcos, ang mga nag-ingon nga drama lamang ang nahitabo nga pagdakop kabahin lamang sa mga pag-atake sa politika batok sa iyang administrasyon ug dili naghulagway sa aktuwal nga proseso nga nagpadayon sa korte.
Gidakop si Romualdez human magpagawas og opisyal nga warrant of arrest ang Sandiganbayan base sa kasong gisang-at sa Office of the Ombudsman.
Sa pagkakaron, nagpabilin si Romualdez sa Philippine General Hospital alang sa independent medical examination human ibalhin gikan sa Cardinal Santos Medical Center.
Samtang, gipadayag ni Interior Secretary Jonvic Remulla nga wala gayod manghilabot ang Pangulo sa pagdakop sa kanhing lider sa Kamara.
Giangkon usab sa kalihim nga sakit alang sa Pangulo ang nahitabo tungod sa suod nga relasyon nilang duha, apan iyang gipatin-aw nga kabahin kini sa katungdanan sa gobyerno ug sa pagpatuman sa balaod.
