Gitan-aw sa kapulisan ang mga posibleng kakulang sa seguridad sa Banga National High School human nakalusot sa sulod sa eskwelahan ang menor de edad nga suspek nga armado atol sa insidente sa pagpamusil.
Sumala kang P/BGen. Allan Manibog, Regional Director sa PRO 12, posibleng nakuha sa suspek ang armas sa balay sa iyang amahan atol sa paniudto, diin posibleng gitago niini ang armas sulod sa iyang pantalon sa pagbalik sa eskwelahan.
Nakaagi usab ang suspek sa gate nga wala mamatikdi sa guwardiya.
Matud ni Manibog, adunay ubang agianan sa palibot sa school compound nga mahimong malabyan sa mga estudyante, busa gisugyot ang dugang nga fencing ug security personnel aron mas mapahugot ang pag-check sa mga mosulod sa eskwelahan.
Samtang, padayon ang pagkuha sa kapulisan sa mga impormasyon bahin sa posibleng motibo sa insidente, lakip ang online activities ug mga conversation sa suspek.
Gikumpirma ni Manibog nga adunay manifesto nga gi-publish sa suspek sa TikTok ug adunay kalambigitan niini sa usa ka True Crime Community o TCC, samtang gihulat ang resulta sa digital forensic examination sa mga cellphone.
