Giduso karon sa Philippine National Police (PNP) mga gipanguluhan ni PNP Chief PGen. Nicolas Torre III ang paggamit sa mas daghang body-worn camera, drone, ug mobile closed-circuit televisions (CCTVs) aron mapadali ang oras sa pagtubag sa mga pulis sa mga emerhensya sa publiko.
Sa interbyu, si Police Regional Office III Director ug PNP Spokesperson PBGen. Jean Fajardo gikompirmar nga ang PNP sa pagkakaron adunay labing menos 2,700 ka body-worn cameras, diin 648 niini ang makahimo sa live broadcast samtang ang uban gigamit sa recording.
Matod niya nga kun fully operational na ang 911, gusto mismo sa hepe nga magsul-ob og body cams ang tanang pulis nga nagpatrolya.
Kini human nimando si Torre atol sa ilang unang Command Conference nga mas moderno ang kapolisan sa pagtubag sa panginahanglan sa katawhang Pilipino, ilabi na sa pagmintinar sa kahapsay ug kalinaw sa mga komunidad.
Samtang, tungod niini, nagplano usab ang PNP nga mogamit ug drone ilabina sa mga dagkong panagtapok diin sa pagkakaron anaa na sa 965 ka drone ang giandam sa organisasyon.
Ang bag-ong modernized approach sa PNP naglakip usab sa paggamit sa CCTV cameras alang sa 360° surveillance sa mga pampublikong lugar ug bisan sa mga dagkong dalan sa nasud.
