GENERAL SANTOS CITY – Gipaspasan sa pipila ka militanteng grupo sa Soccsksargen o Rehiyon 12 ang tubag ni Presidente Ferdinand Marcos Jr. aron madugangan ang sweldo sa mga mamumuo.
Sa pakighinabi sa Bomboradyo Gensan, gibutyag ni Herbert Demos, Regional Director sa SENTRO-Soccsksargen, angayang i-certify ang legislated P100 wage hike nga urgent.
Gusto nilang direktang madunggan gikan sa pagpamulong sa Presidente atol sa iyang ikatulong State of the Nation Address (SONA) kung unsa ang iyang lakang kalabot niini.
Gitataw niini, dili makiangayon ang kasamtangang minimum nga suholan sa rehiyon kon itandi sa bayronon karon sa kuryente ug tubig ug uban pa ug taas nga presyo sa mga palaliton.
Matod niya, kung tan-awon ang legislated P100 wage hike ang dili paigo ug para sa ilang grupo, angayang P150 ang iusbaw sa suholan.
Matod pa niini, ang ilang lihok protesta sa adlaw mismo sa SONA sa Pangulo aron mapaminawan ang ilang mga mulo ug ingon man mahimo silang tingog sa mga ordinaryong lungsuranon.
Gawas sa ubos nga suholan, gusto sa maong mga grupo nga mapatuman ang Magna Carta of the Poor Act.
Samtang, imbes nga hatagan og pagtagad ang away sa politika ni Pang. Marcos ug Ex-Pres. Rodrigo Duterte, angayan lang nga ipadaplin ug pangitaan og solusyon ang mga problema nga giatubang sa nasud.
