GENERAL SANTOS CITY – Gabii pa lamang taas na ang pila sa mga residente sa Barangay Bula sa tumong nga makakuha ug educational assistance karong adlawa.
Gani, nagbanig na ang uban sa gawas sa mismong gate sa Bgry. Hall.
Tungod niini nagpagawas dayon ug abiso ang taga Barangay nga mamauli na lamang ang mga residente tungod dili nila tugtan ang maong sitwasyon kay ang hilera sa katawhan kagabii mulampas na sa dalan atubangan sa Barangay hall ug ang ulo sa maong linya nagsugod sa pultahan sa barangay gym.
Gilayon nga nagpagawas ug advisory ang Barangay nga basin ug dili ihinayon sa taga DSWD ang pagpanghatag sa educational assistance tungod wala na masunod ang health protocol tungod sa kadaghan sa mga nakahilera nga mga residente.
Gilayon nga gipanghuraw sa taga Barangay ang mga tawo ug adunay namauli apan kasagaran ang wala na namahawa sa lugar samtang ang uban nagbitbit ug bangko ug ang uban karton nga pwedi magamit kahigdaan.
Una ng gibutyag ni DSWD 12 Director Restituto Macuto nga sa Munisipyo na i-agi ang pay out karong adlawa samtang ang dili maakomodar ang didto na sa sunod mga adlaw nga sabado.
Gibutyag usab ni macuto nga mamahimo nga tubagon ang mga pangutana sa DSWD page aron ma evaluate human gi discourage ang walk -in apan pwedi sa email.
Hinuon giawhag kadtong mga muadto gayud sa lugar nga ihulog sa mga drop boxes ang mga kinahanglanon nga papeles ug mupauli na lamang.
