Gisugdan na karong adlawa ang programa sa Physical Fitness Training alang sa mga overweight o sobra sa timbang nga mga pulis sa tibuok nasod.
Tumong niini nga mapauswag ang kusog, ug kahimsog sa panglawas sa mga miyembro sa kapulisan nga adunay labaw nga timbang, ug aron maangkon nila ang mas maayong porma alang sa mas epektibong pagserbisyo sa publiko.
Ang maong programa gipasiugdahan sa Philippine National Police (PNP) isip kabahin sa ilang kampanya batok sa unhealthy lifestyle ug kabahin sa disiplina sa organisasyon. Sa unang hugna sa training, giila ang mga personnel nga misobra sa standard Body Mass Index (BMI), ug sila gi-require nga moapil sa regular nga ehersisyo, dietary counseling, ug health monitoring.
Matud pa sa mga opisyal sa PNP, dili kini silot apan usa ka oportunidad aron matabangan ang ilang mga kauban nga maangkon pag-usab ang maayong kondisyon sa lawas.
Gilauman nga molungtad ang training og pipila ka semana hangtod makab-ot sa mga partisipante ang gikinahanglan nga timbang ug fitness level.
