Hugot nga gimonitor sa Provincial Health Office o PHO-Sarangani ang kahimtang sa panglawas sa mga residente taliwala sa haze nga gikan sa sunog sa Indonesia ug nakaapekto sa pipila ka bahin sa SOCCSKSARGEN.
Sumala ni Dr. Arvin Alejandro, Provincial Health Officer sa Provincial Health Office, padayon nilang gibantayan ang mga kaso sa upper respiratory tract infection o URTI, nga usa sa mga kondisyon nga mahimong maapektuhan sa paglanghap sa hugaw o polluted nga hangin.
Bisan pa sa presensya sa haze, gipahayag sa PHO-Sarangani nga wala pa sila makamatikod og pagsaka sa ihap sa mga kaso sa URTI sa probinsya.
Giawhag usab ang mga health worker nga ireport dayon sa Municipal Health Office o sa labing duol nga health center kon adunay namatikdan nga pagtaas sa mga kaso sa respiratory infection aron mahatagan dayon og hustong konsultasyon ug pag-atiman ang mga pasyente.
Samtang, gipahinumdoman ang mga residente nga mag-amping ilabina kon klaro nang makita ang haze sa ilang lugar. Girekomenda ang paggamit og face mask kon mogawas, pag-inom og igo nga tubig ug pagbaton og sakto nga pahulay ug tulog aron mapadayon ang maayong kondisyon sa lawas
Gidasig usab ang publiko nga likayan ang dugay nga pagpabilin sa gawas kon baga ang haze, ilabina ang mga bata, senior citizens ug mga adunay daan nang sakit sa baga o kasingkasing.
