GENERAL SANTOS CITY – Kusganong gikondena sa pamunuan sa 6th Infantry (Army) Division ug Joint Task Force Central ang pagkamatay sa upat ka mga sakop sa kasundalohan sa Tuayan 1, Datu Hoffer, Maguindanao del Sur, alas 10:00 kagahapon sa buntag Marso 17, 2024 sa usa ka ambush.
Nahitabo ang insidente samtang ang mga sundalo nagpadulong na sa ilang headquarters human naghatod og mga gamit sa opisina ug namalit og pagkaon alang sa “iftar” o pamahaw alang sa puasa sa Ramadan.
Nakaangkon og samad pinusilan sa lain-laing bahin sa ilang kalawasan ang mga biktima nga gidala pa sa Maguindanao Provincial Hospital sa mirespondeng mga sakop sa 40th IB ug mga personahe sa Datu Hoffer Municipal Police Station, apan gideklara nga dead on arrival sa mga attending physician.
Sa karon naghimo na ang militar og hot pursuit ug combat-clearing operations sa lugar.
