Gipasigarbo sa Philippine Drug Enforcement Agency nga nasakmit nila ang kapin sa P147.25-M nga kantidad sa ilegal nga drugas atol sa usa ka semana nga operasyon.
Base sa datus sa Anti-illegal Drug Operations Accomplishment Report, kini nga gidaghanon natala niadtong Abril 11 hangtod 18 ning tuiga.
Sa nasangpit nga panahon, ang ahensya nipahigayon og 69 ka anti-drug operations nga miresulta sa pagkasikop sa 79 ka mga drug personalities. Lakip sa labing dako nga nasakmit sa PDEA mao ang 1000 gramos nga Shabu gikan sa Brgy. Minuyan, San Jose del Monte, Bulacan.
Mokabat usab sa 16,000 gramos nga shabu ang nasakmit sa Brgy. New Mahayag, Catbalogan City, Western Samar.
Moabot sa 984 gramos nga ketamine ang nasakmit sa Port Area, Manila human sa operasyon.
Giguba usab niini ang mga 13,200 ka tanum nga marijuana sa Benguet ug kapin sa 49,000 ka tanum nga marijuana gikan sa Kalinga ug Ifugao.
Wala’y hunong ang ahensya sa panawagan sa publiko nga suportahan ang kampanya batok sa ilegal nga drugas.
