Gipanghimakak ni Philippine Charity Sweepstakes Office (PCSO) Chairman ug kanhi Regional Trial Court (RTC) Judge Felix Reyes ang pasangil nga nalambigit siya sa pag-ayo sa kaso sa banggiitang negosyante nga si Charlie “Atong” Ang.
Kini human usab sa alegasyon sa whistleblower sa mga nawala nga sabungero nga si Dondon Patidongan alyas Totoy.
Human niini, gihagit ni Reyes si alyas Totoy nga ilhon ang partikular nga kaso ni Atong Ang o unsa man nga sa mga nawala nga sabungero nga gilihok niini kaso pabor kang Ang.
Gibutyag ni Reyes nga iyang tugotan ang Bureau of Immigration nga ipahibalo sa publiko ang iyang mga biyahe sa gawas sa nasod sukad siya niretiro sa hudikatura niadtong Oktubre 2021.
Matod pa niya nga nasorpresa siya nga nalambigit pa siya sa isyu usa ka adlaw human mi-apply isip Ombudsman.
Bisan pa niini, gipasalig ni Reyes nga andam siyang mokooperar sa bisan unsang imbestigasyon aron malimpyohan ang iyang pangalan gikan sa walay basehanan nga mga pasangil.
