Nagkaistorya si President Ferdinand Marcos Jr ug US VP Kamala Harris pinaagi sa telepono kagabii.
Sa maong higayon, gipasiugda ni US Vice President Harris ang kamahinungdanon sa pagmintinar sa lig-on nga relasyon sa ekonomiya tali sa Pilipinas ug Amerika, ilabi na kay nagpadayon ang agresyon sa China sa West Philippine Sea.
Matod ni Harris nga subling misaad sila nga suportahan ang Pilipinas sa away niini kalabot sa isyu sa West Philippine Sea.
Ang phone call meeting tali sa PBBM ug Harris nagsunod sa trilateral phone conversation tali sa US President Joe Biden ug Japan Prime Minister Ishiba Shigeru.
Gisultihan ni Harris si Pang Marcos nga nasayod siya nga aduna siyay ‘bipartisan’ nga suporta gikan sa American Congress. Agig tubag niini, nagpasalamat si PBBM kang Harris nga nag-ingon nga ang panag-uban sa Pilipinas ug Amerika nagkalig-on ug mas produktibo.
Gipasiugda ni President Marcos kang Harris nga ang pagpirma sa trilateral nga kasabutan sa Washington dako nga tabang sa pagbag-ong dynamics sa West Philippine Sea ug Indo-Pacific Region.
Matod niya ang trilateral ties sa tulo ka nasod giila sa ASEAN region nga nagpalapad sa ilang posisyon kalabot sa isyu sa West Philippine Sea. Gidayeg ni Pang. Marcos si Harris tungod sa iyang mga kontribusyon sa Pilipinas.
Partikular nga gipunting sa Presidente ang lebel sa ekonomiya, diplomatiko, depensa ug seguridad, nga iyang gihulagway nga “makapadasig kaayo.”
Sa wala pa matapos ang tawag sa telepono, giimbitar na usab ni Pang. Marcos si Harris nga moadto sa Pilipinas.
