Gikumpirma ni Department of the Interior and Local Government (DILG) Secretary Jonvic Remulla nga luwas si Senador Ronald “Bato” dela Rosa ug giubanan sa mga security personnel human sa tensyon ug lockdown sa Senate building.
Sa iyang pagpakita uban sa mga media personnel sa Senado, ang kalihim miingon nga ilang gipahibalo si Dela Rosa nga sila didto aron masiguro ang integridad sa Senado ug ang proteksyon sa tanang senador nga anaa sa building.
Gipasalig usab ni Remulla kang dela Rosa nga dili nila siya dakpon.
Sa sayo pa, natay-og ang Senado human madungog ang mga buto sa armas kagabii Miyerkules, Mayo 13 samtang ang Senado naka-lockdown, diin ang senador anaa karon ubos sa protective custody.
Sumala ni Remulla, ilang giimbestigahan karon ang mga identidad sa mga tawo nga naa sa luyo sa sunod-sunod nga pagpamusil.
Mitumaw ang tensyon sa Senado human ang Korte Suprema napakyas sa pag-isyu og temporary restraining order (TRO), nga gipangayo ni Dela Rosa taliwala sa warrant of arrest gikan sa International Criminal Court (ICC).
