GENERAL SANTOS CITY – Blangko pa ang mga ginsakpan sa Banga Municipal Police Station kalabot sa ilhanan sa patay’ng lawas nga nakaplagan sa may suba sa Brgy Cabuling, Banga, South Cotabato.
Matud ni PO3 Den Lacuesta, imbestigador ng nasampit nga presinto, nakaplagan sa duha ka bata ang naasoy’ng patay’ng lawas kaniadtong Dominggo, Oktobre 1.
Gikabutyag nga naputos sa sako ang katunga sa lawas sa biktima gikan sa hawak paingon sa ulo.
Nagsul-ob kini ug puti nga tshirt ug maong nga pantalon dihang nakaplagan.
Walay nakita nga mga samad sa naasoy’ng patay’ng lawas, hinungdan nga gituuhang nahutdan ug hangin ang biktima human giputos usab ug cellophane ang iyang ulo, nga maoy hinungdan sa iyang kamatayon.
Gituuhan usab nga dili kadto residente sa lugar ug gilabay lamang sa may suba.
Sa karon nagpabilin pa sa lokal nga punerarya ang naasoy’ng patay’ng lawas samtang gipaabot nga kuhaon kini sa pamilya.
