GENERAL SANTOS CITY- Naghinam-hinam na ang pamilya Dalquez alang sa pag-uli sa mahal sa kinabuhi nga si Jennifer Dalquez, ang Pinay DH nga nabilanggo sa United Arab Emirates (UAE).
Kini human maluwas ang nasampit sa silot-kamatayon, ug gisintensyahan na lamang ug lima ka tuig nga pagkabilanggo, human mapatay ang Emirati employer nga misulay manglugos kaniya.
Matud kang City Councilor Lourdes Casabuena, committee chair on Labor and Overseas Employment sa Sangguniang Panglungsod, naserbisyuhan na ni Jennifer ang unang duha ka tuig ug tunga sa bilangguan.
Hinungdan nga ang nahibiling duha ka tuig ug tunga na lamang ang kinahanglan niyang itinir sa presohan sa nasampit nga nasud, ug makauli na sa 2019.
Nakahinabi na usab matud pa niini ang inahan ni Jennifer nga si Rajima Dalquez ug gibpadayag niini ang iyang kalipay ug pagpasalamat sa maayong balita, ug gipaabot na lamang ang higayon nga makauli dinhi sa dakbayan ang anak.
Andam na usab matud pa ang lokal nga panggamhanan alang sa unsa mang hinabang nga ihatag kang Dalquez ug sa pamilya niini sa iyang pag-uli, gawas pa sa una nang natabang kaniya sa gobyerno ug sa ubang ahensya sama sa DOLE ug OWWA ug ubang mga NGOs.
