GENERAL SANTOS CITY – Nangalap pa og dugang ebidensya ang kapulisan sa gipahigayong imbestigasyon kalabot sa usa ka retiradong sundalo nga gipusil patay sa Yumang Street, Barangay San Isidro ning syudad.
Dead on the spot ang biktima nga giila sa pangalan nga si Ret. Col. Jack Bobo Espera, 67anyos, residente sa Cagayan de Oro og temporaryong nagpuyo sa nasampit nga lugar.
Kahibaluan nga kalit gipabuthan ang biktima sa wala mailhing mga suspek nga nakasakay og motorsiklo.
Gipatutukan na ni Police Captain Brent Ian Salazar, hepe sa San Isidro Police Station ang pag-imbestiga sa insidente apil ang background sa biktima nga posibleng may kalabotan sa motibo sa krimen.
Sa inisyal nga impormasyon sa kapulisan nga ang biktima naapil matud pa sa mga trader o nagbaligya og taklobo sa GenSan og Sarangani sumala sa pipila nga nakaila sa nasampit.
Sa pakighinabi sa Bombo Radyo kang Alias Elmer, trabahante sa patahian nga atubangan sa crime scene nga samtang sila nanahi kalit nakit-an nga natumba ang biktima human sa usa ka buto nga nadunggan.
Samtang mikanaog sa motor ang gunman og gidul-it og pusil ang biktima sa makadaghang higayon.
Gibutyag pa niini nga payaton ang mga suspek og nakatabon ang mga nawong.
Gawas sa tirador og kauban nga driver, may mga nakakita nga mga tawo sa lugar nga may lain pang motorsiklo nga adunay duha ka sakay ang anaa sa unahan nga bahin sa crime scene.
Nakaangkon ang biktima og igo sa bala sa ulo nga maoy hinungdan sa hinanali niining kamatayon.
Narekober sa posisyon sa kapulisan sa crime scene ang pito ka empty shell sa wala pa masuta nga matang sa armas.
