GENERAL SANTOS CITY – Gibutyag ni Police Chief Superintendent Cedric Train, labaw sa Police Regional Office 12 nga giimbestigahan na sa investigation section sa Regional Public safety company ang insidente matud pa nga pagpangulata sa usa ka senior officer sa nagpangalan ug Po1 Kelvin Seth Lugan, nga nadestino sa Human Resource and Doctrine Development sa PRO-12.
Hinuon, sumala pa ni Train angayang kuhaan ug pahayag ang tanang pulis nga naa atul sa insidente.
Gibutyag sa regional director, nagpabilin pang nagpaalim sa ospital si Po1 Lugan og naa na matud pa sa maayong kondisyon. KOn ugaling mapamatud-an nga tinuod nga nangulata wala pa gipanganlang nga opisyal nga gikaingong nangulata, mag-atubang ang nasampit og kasong administratibo og kriminal nga kaso og pwedeng matangtang sa pwesto.
Kahibaluan nga natigayon ang gikaingong pagpangulata niadtong July 3, usa ka adlaw human nigradwar si Po1 Lugan.
Gipa-formation ni Po2 Nestor Cerdana sa RPSB-12 ang mga bag -ong graduate nga pulis og dayun gipa-piyong ang mga mata.
Usa ka senior official matud pa ang usa-usa nga nagtawag sa ilang apelyido kon asa dihang siya na ang gitawag, kalit siyang gisumbag kausa sa tiyan og gisundan og kaupat ka higayon.
Gitulak siya gipabalik sa linya ug dayun gipa-push-up. Natigayon kini alas 3:30 sa kaadlawon niadtong July 3.
Alas 11:00 sa buntag pagkahuman mibalik sa bunkhouse, namatikdan sa kaubang pulis nga bag-ong graduate si Po1 Lugan nga gapangluspad hinungdan nga gidala kini sa klinika.
Tungod wala nawala ang sakit sa tiyan ni Po1 Lugan luyo sa pagtumar na ug tambal, gidala ang nasampit sa ospital.
Nasayran human gisuta sa doktor nga nakaangkon ug blood clot ang tiyan sa nasampit.
Gikaingon nga planong magpasaka og kaso si Po1 Lugan batok sa senior official nga nagpasakit kaniya.
