GENERAL SANTOS CITY – Padayong gipangita sa kapulisan sa Polomolok ang mga suspek sa natigayong pagpamusil miaging gabii sa ilang area of responsibility nga gumikan lamang sa giilugang babaye.
Kahinumduman nga duha patay nga giilang sila si Ian Dakingking, 22 anyos, ug Arthur Atagalo, 35, samtang ang samaron mao si Rembrant Claver 23 pulos residente sa Purok 5 Glamang, Polomolok South Cotabato.
Nahitabo kini sa gipahigayong drug racing nga kabahin sa fiesta celebration sa lugar, kung asa gikabutyag nga nakauban matud pa sa tulo ka biktima ang usa ka wala maila nga babaye apan miabot ang duha ka nakamotor nga lalaki ug gipugos ang babaye sa pag-uban kanila.
Wala matud pa nagmalampuson ang duha ka lalaki tungod nagpabilin ang babaye didto sa tulo.
Dihang hapit na magsugod ang lumba sa mga motor misakay matud pa sa motor ang tulo aron pagkuha ug gasolina apan gisundan sila ug laing motorsiklo ug didto natigayon ang pagpamusil.
Samad sa likod ug ulo ang naangkon nilang Dakingking ug Atagalo hinungdan nga nadeklara nga dead on arrival samtang padayong nagpaalim si Claver sa Dr. Jorge P. Royeca hospital ning dakbayan.
