Gidayeg ni Presidente Ferdinand Marcos Jr ang mga lakang sa Anti-Terrorism Council (ATC) nga matud niya nagdala og pag-uswag sa tumong nga makagawas ang Pilipinas sa Financial Action Task Force (FATF) Grey List.
Atol sa 33rd ATC Regular Meeting ug Year-End Celebration nga gipahigayon sa Malacañang, si PBBM miingon nga kini nga milestone makabenepisyo sa minilyon ka mga Filipino, lakip na ang mas hapsay nga remittance alang sa mga overseas Filipino workers ug dugang pagsalig sa mga investors.
Giila usab sa Presidente ang mga nahimo sa ATC sa pagguba sa mga teroristang organisasyon, ug pagpalig-on sa seguridad sa nasud.
Matod niya, dili lamang kini pagpakita sa determinasyon sa nasud nga ipatigbabaw ang lagda sa balaod ug pagsiguro sa kaluwasan sa mga komunidad, apan kini usa usab ka pagpakita sa usa ka lig-on nga pasalig sa pagkamay-tulubagon, hustisya, ug kalinaw.
Samtang, gipasiugda sa Chief Executive ang kamahinungdanon sa pagpalig-on sa kabatan-onan ug lokal nga liderato isip estratehiya batok sa terorismo.
Dugang pa nga gipasabot ni Presidente Marcos, ang paghatag og mga kahigayonan alang sa dayalogo ug kooperasyon mao ang pagtanom sa mga binhi sa paglaum ug panaghiusa alang sa mas luwas nga nasud..
