Ginaplanohan pagmaayo sa Philippine National Police (PNP) ang pag-aresto kang Pastor Apollo Quiboloy aron dili na masubli ang insidente kaniadtong June 10, kung asa gihimong ‘human shield’ batok sa mga pulis ang mga babaye og menor de edad nga supporters niini.
Kini ang gibutyag ni PNP Public Information Office Chief Police Colonel Jean Fajardo, dungan sa pag-ingon nga mga delaying tactic sa supporters ni Quiboloy ang usa sa mga rason nganong nadugayan ang pag-serve sa arrest warrant batok sa kontrobersyal nga lider sa Kingdom of Jesus Christ (KOJC).
Sa karon, sumala ni Fajardo, ginakonsidera nila ang uban pang opsyon aron maaresto si Quiboloy aron dili na magsakitay pag-usab ug ilaha na usab nga gipangandaman ang mahimong posibleng depensa sa mga supporter ni Quiboloy.
Kahinumduman nga gibulgar kagahapon ni Davao Regional Director Police Brig. Gen. Nicolas Torre III, nga positibo ang indikasyon nga anaa sa sulod gihapon sa KOJC Compound sa Davao ang puganteng si Quiboloy.
