GENERAL SANTOS CITY – Mukabat na sa P7 million ang kantidad sa iligal nga droga nga nakumpiska sa Philippine Drug Enforcement Agency 12 alang ning tuiga.
Kini ang gibutyag ni Kath Abad, tigpamaba sa PDEA-12, atul sa programang Good Morning Philippines.
Sumala pa nga ang maong kantidad sa iligal nga droga ang gikan sa 62 ka anti-narcotic operations nga ilang napahigayon, kung asa usa ka kilo sa shabu na ang ilang narekober ug unom ka kilo sa marijuana.
Mukabat na usab sa 123 ka mga tawo ang ilang nasikop gikan sa nasampit nga mga operasyon, kung asa may pipila ka high value target sama sa barangay kagawad sa Malapatan, gawas pa sa mga miyembro sa dagkong drug groups, ug mga watchlisted ug targetlisted.
Bisan paman, nagpadayon matud pa ang ilang mas gipakusgan nga supply ug demand reduction ug mga drug clearing operations sa tibuok rehiyon.
Ug gani, sa pagkakaron, 57% kon 657 na ka mga barangay sa Region 12 ang nadeklarang drug cleared, gikan sa kinatibuk-ang 1,158 ka barangay.
Kahinumduman nga gumikan sa aktibong pagpahigayon ug mga operasyon sa PDEA-12, gideklara silang rank no. 2 sa drug clearing operation sa tibuok nasud.
