Posibleng mosaka og dako ang presyo sa mga produktong petrolyo sa mosunod nga semana samtang nagpadayon ang pagsamot sa armadong panagbangi sa United States, Israel og Iran sa Middle East.
Base sa unang tulo ka adlaw sa trading karong semanaha, gilauman sa mga tinubdan sa industriya sa lana nga mosaka ang presyo sa gasolina og P7.09 kada litro, samtang ang diesel posibleng mosaka og P15.33 kada litro.
Ang opisyal nga pag-adjust sa presyo sa mga produktong petrolyo kasagarang ipahibalo matag Lunes, ug ipatuman sa mosunod nga adlaw.
Sumala sa Department of Energy, posible pang mudugang ang pagsaka sa presyo sa petrolyo tungod sa mga panghitabo sa global market lakip na ang pagsira sa Strait of Hirmuz, usa sa pinakaimportanteng agianan sa mga barkong nagdala og lana sa kalibutan.
Miingon usab ang ahensya nga mangayo sila og kooperasyon sa mga kompanya sa petrolyo aron hinay-hinayon o ‘staggered’ ang pagpatuman sa price increase sugod sa sunod semana.
Kahinumdoman nga niaging Marso 3, 2026, misaka ang presyo sa petroleum products diin nadugangan og P1.90 kada litro ang gasolina, P1.20 kada litro ang diesel ug P1.50 kada litro ang kerosene.
