Misaka pag-ayo ang mga na-report nga online threats sa Region 12 human sa pagpamusil sa Banga National High School niadtong Septiyembre 18.
Sumala kang P/BGen. Allan Manibog, Regional Director sa PRO 12, 13 lamang ang natala gikan Hulyo hangtod Septiyembre 17, apan misaka kini sa 65 sulod lang sa napulo ka adlaw human sa insidente.
Kadaghanan sa mga nalambigit mga menor de edad nga nag-ingon nga nagbinuang lamang, apan giatiman gihapon kini sa kapulisan. Matud ni Manibog, posibleng nagsundog lamang ang uban sa nahitabo sa Banga ug wala gyuy tinuod nga plano sa pagpatuman sa ilang mga hulga.
Gipasiugda ni Manibog ang pagpalig-on sa anti-cybercrime units sa PNP ug ubang law enforcement agencies tungod sa pagsaka sa mga online threats.
Samtang, ang menor de edad nga naa sa kustodiya sa DSWD sa General Santos City tungod sa giingong online threat ipailalom sa evaluation ug assessment subay sa Republic Act 9344 o Juvenile Justice and Welfare Act.
