Gibungkag ni Nepal President Ramchandra Paudel ang ilang parliamento sa nasud ug nagtakda og bag-ong eleksyon alang sa Marso 5, 2026.
Ang desisyon nahitabo human sa usa ka semana nga kagubot nga misangpot sa pagtudlo sa unang babaye nga punong ministro sa nasud.
Sumala sa usa ka pahayag gikan sa opisina ni Paudel kaniadtong Biyernes, gitudlo niya si kanhi Chief Justice Sushila Karki nga mopuli isip interim leader.
Gitudlo siya human sa mapintas nga mga protesta nga gipangulohan sa usa ka grupo sa mga batan-on nga nailhan nga “Gen Z” nga nagprotesta sa korapsyon sa gobyerno.
Kahinumduman nga napugos si kanhi Prime Minister K.P. Sharma Oli sa pag-resign human migrabe ang tensiyon ug nagbilin ug labing menos 51 ka tao ang namatay ug kapin sa 1,300 ang naangol.
Gitudlo si Karki human sa duha ka adlaw nga negosasyon tali ni Presidente Paudel, Army Chief Ashok Raj Sigdel, ug mga lider sa protesta.
Samtang, ang India, ang habagatang silingan sa Nepal, nagpagula usa ka pahayag nga naglaum nga ang mga panghitabo makahatag kalinaw ug kalig-on sa ilang silingan nga nasud.
