Gusto sa mga piskal sa International Criminal Court nga sugdan ang husay ni Kanhi Pres. Rodrigo Duterte sa Nobyembre 30, 2026 kalabot sa kaso sa Crimes against humanity. Sumala sa prosekusyon, ang pag-andam sa mga ebidensya ug mga dokumento mahuman sa dili pa matapos ang Septyembre 2026, mao nga ilang gisugyot ang maong petsa sa husay.
Ang mga abogado sa mga biktima nangayo og mas sayo nga iskedyul sa Septyembre 2026 aron mapadali ang pag-uswag sa kaso ug mahatagan ang ubang mga biktima og higayon nga makaapil sa proseso.
Samtang, ang depensa ni Duterte, nga gipangulohan sa iyang bag-ong legal counsel nga si Peter Haynes, misubli nga ang kahimtang sa panglawas sa kanhi presidente kinahanglan nga susihon pag-usab aron mahibal-an kung siya angayan pa ba nga moatubang sa husay. Sumala sa depensa, ang miaging medikal nga ebalwasyon nga gihimo sa unang hugna sa kaso dili igo.
Niadtong Abril 23, gikumpirma sa ICC ang mga kaso batok kang Duterte human siya gideklarar nga “Fit to stand trial” base sa usa ka independente nga medikal nga eksaminasyon. Ang kaso gibalhin usab gikan sa Pre-Trial Chamber I ngadto sa Trial Chamber III isip pagpangandam alang sa sunod nga hugna sa husay.
Si Duterte nag-atubang og tulo ka ihap sa pagpatay ug pagsulay sa pagpatay isip mga krimen batok sa katawhan nga may kalabotan sa giingong pagpamatay ubos sa kampanya batok sa droga sa dihang siya ang mayor sa Davao City ug sa ulahi presidente sa Pilipinas.
