Gihatagan ug pasidungog sa Armed Forces of the Philippines ang sakop sa Philippine Navy nga nakaangkon ug grabeng injury sa gipahigayong resupply mission sa Ayungin shoal niadtong Lunes, Hunyo 17 human nga i-harass sa Chinese forces.
Gihatag kang Seaman First Class Jeffrey Facundo ang “wounded personnel medal” gikan kang AFP chief Romeo Brawner Jr. nga personal nga gibisita ang bedridden nga Navy personnel.
Gisultihan usab ni Brawner ang nasamdang Navy personnel nga magpaayo og dili mawad-an ug paglaum ug andam sila nga maghatag sa mga kinahanglan niini.
Gipasalamatan usab ni Facundo ang AFP sa gihatag sa iyang medalya apan mibalibad kining tubagon ang pangutana sa sakop sa media kalabot sa naangkon niining injury nga naputlan kini ug tudlo ug kung unsa ang nahitabo atol sa ilang resupply mission tungod dili kini awtorisadong mamahayag kabahin sa insidente.
Una ng gireport nga giharang, gibangga ug misakay pa ang mga China Coast Guard personnel sa gamay nga bangka sa Pilipinas nga nagresulta sa pagkaangol sa walo ka sakop sa PH Navy samtang gipahigayon ang resupply mission.
