GENERAL SANTOS CITY – Blangko pa ang kapulisan may kalabutan sa motibo sa kamatayon sa wala maila nga lalaki nga nakaplagang wala nay kinabuhi sa Ayano Lopez compound sa Zone 7 Brgy. Bula, likod nga bahin sa Bula National School of Fisheries kagahapon, alas 6 sa buntag.
Matud ni P/C/Insp. Neil Salvacion, hepe sa Bula Police Station, nga nagpadayon ang imbestigasyon og sa inisyal nga pagsusi sa SOCO ngadto sa lawas, 16 ka samad dinunggaban ang nahiagom sa biktima.
Icepick ang gituohang gigamit sa pagdunggab, basi usab sa agi sa buslot sa mga samad luyo nga wala nahibal-an kon pila ka tao ang mipatay sa biktima.
Posibleng nakadagan pa ang biktima human nga gidunggab tungod adunay mga pat-ak sa dugo sa kalsada paingon sa lugar kon asa siya nakaplagang patay. Walay nakaila nga mga residente pati sa barangay sa biktima.
Apan namahayag ang pipila sa mga nagpuyo sa lugar nga ilang nabatian ang pag-usag sa ilang mga iro alas-3:00 sa kaadlawon apan wala nila panumbalinga.
Natingala na lamang dihang pagka-alas 6:00 sa buntag daghan nang nagtapok sa kalsada tungod usa ka tawo ang nakaplagang nagkulob og patay na.
Pagkakaron, nagpabiling naa sa punerarya ang patayng lawas sa biktima og wala pa mailhan. Nagsul-ob kini og kulay blue nga tshirt og combination nga kulay puti og yellow ang short.
Ang maong lalaki ang gibanabanaang nagpangidaron og 29-30 anyos og 5’2 ang gitas-on.
