GENERAL SANTOS CITY – Gikunsidera sa kapulisan nga usa ka lig-on nga ebidinsya ang nakuha nga sapot ug nagkadugo nga kutsilyo ang magtudlo sa tinuod responsable sa pagpatay sa syete anyos nga si Princess Arian Cabucos nga taga Purok Malinawon, Barangay Conel ning syudad.
Matud ni Police Major Robert Forez, hepe sa Mabuhay Police Station nga ipailawom sa paghiling ang nahisgutang mga butang.
Kahinumduman nga nakita ang bata nga anaa na sa advance state of decomposition Marso trese nga wala nay sapot nga nakasulod sa sako ug gilabay sa kasagbutang bahin sa usa ka bakante nga luna.
Una nga mikatag ang hulagway sa bata human nawala kaniadtong Marso 10, 2024.
Matud ni Major Fores nagpabilin nga person of interest ang 74 anyos nga si Ermilendo Sajul Sajulga, nga silingan usab sa biktima.
Una nga migawas nga person of interest ang amahan sa biktima apan gitangtang sa listahan human nahibaw-an sa nga nagtago-tago tungod may dunay pending warrant of arrest sa kasong pagpanglugos human gi-amung-amongan ang kaugalingong anak nga si Princess.
Gitangtang usab nga person of interest ang uyoan sa biktima tungod kay walay testigo nga makatudlo nga aduna kini kalambigitan sa krimen. Gipasalig ni Fores nga mahatagan og hustisya ang makaluluoy nga gidangatan sa biktima.
