GENERAL SANTOS CITY – Ngitngit pa sa alkitran ang gisubay karon sa mga nahibilin nga pamilya nga biktima sa Maguindanao masaker.
Kini ang panglantaw ni Monette Salaysay, asawa sa usa sa mga biktima sa masaker. Kini human gipasa-pasa sa ilang legal counsel nga naghupot sa kaso.
Pagsaysay niini nga nawad-an na sila ug kahibalo sa dagan sa kaso tungod wala na mihatag pa ug update sa kaso gani miadto sa Kauluhan ang inahan ni Victor Nuñez nga si Catherine Nuñez aron sa pagpangutana sa dagan sa kaso nga mag-walo ka tuig na sukad nahitabo ang mangilngig nga krimen.
Gikan matud pa kang Atty. Harry Roque gipasa na kini sa laing mga abogado.
Gani wala na makahibalo nga bag-uhay lamang gipabuhi-an sa Quezon RTC 221 ang tulo ka mga akusado nga silang Kominie Inggo, Dexson Saptula ug Abas Anongan nga giingon niini nga mga private army sa mga Ampatu-an.
Misalig matud pa sila kang Atty. Roque human misaad nga kuyugan ngadto kang Pangulong Rodrigo Duterte human miingon nga dili na musugot nga maabtan pa ug walo ka tuig ang kaso nga dili mahatagan sa hustisya.
Kahinumduman nga 58 ka mga biktima sa masaker ang gipatay didto sa Ampatu-an Maguindanao niadtong Nobyembre 23, 2009.
