GENERAL SANTOS CITY – Patay ang usa ka NPA member human matud pa misukol sa mga otoridad dihang gisilbi ang warrant of arrest sa Sitio Ponpongan 1, Brgy Limulan, Kalamansig, Sultan Kudarat.
Giila ni P/Captain Samuel Dominggo ang nasampit nga si Bantilan Ducoy, gituohang miembro sa Guerilla Front 73 sa New People’s Army(NPA) nga nag-atubang sa kasong robbery with homicide.
Ang warrant of arrest ang pirmado ni Hon. Allan Edwin P. Boncavil, Acting Presiding Judge sa Regional Trial Court (RTC) 12th Judicial Region, Branch 19, Isulan, Sultan Kudarat.
Nagpahigayon og manhunt charlie operation ang mga otoridad batok sa suspek armado og caliber .45 pistol, aduna usab gibitbit nga granada og cal. 38 revolver.
Nagpabuto ang suspek sa kapulisan gamit ang caliber .45 pistol nga nagresulta sa pagkaigo ni Police Master Sergeant Niño Edzille John Carazo Manzano sa ibabaw nga bahin sa wala niining dughan hinungdan nga gidala sa balay-tambalanan sa Lebak, Sultan Kudarat.
Tungod sa pagpabuto sa suspek mibalos og buto ang kapulisan nga nagresulta sa pagkaigo sa suspect sa nagkadaiyang bahin sa lawas niini.
Gidala ang suspek sa ospital apan gideklarang dead on arrival sa attending physician.
Narekober nga ebidensya sa crime scene ang usa ka chamber loaded shooters commodore, caliber .45 pistol nga adunay magazine nga adunay pito ka mga buhing bala sa caliber .45, usa ka unit chamber loaded caliber .38 revolver nga adunay unom ka buhing bala alang sa caliber .38 og usa ka MK2 fragmentation grenade.
