GENERAL SANTOS CITY – Giangkon sa lokal nga gobyerno sa dakbayan nga may mga tricycle drivers gayud ang maapektuhan oras nga ipatuman sa hingpit kung unsa ang nakalatid sa balaod.
Matud pa ni Atty. Rowi Malayag, acting department head sa Public Safety Office (PSO) nga dili pasagdan sa syudad ang mga nasampit.
Gitahasan na sa gobyerno ang City Social Welfare and Development office (CSWDO) nga maoy maghimo og mga pamaagi sa kooperasyon sa daghan ahensya sa gobyerno aron matabangan sa mga nasampit.
Sa pagbana-bana anaa sa 30,000 ang mga gabiyahe nga tricycle og trisikad sa syudad.
Apan sa inisyal nga gikasabutan nga anaa sa 9,000 hangtud sa 12,000 ka mga prangkisa ang ihatag sa dakbayan.
Sa pamahayag ni Atty. Malayag nga kapin sa 1,000 ka mga tricycle ang may prangkisa ning higayona kung asa daghan ang wala nagrenew.
Hinoon iyang gipaklaro nga dili gayud pwede nga magpamasahero sa dakbayan ang mga tricycle nga gikan sa laing mga lugar.
