GENERAL SANTOS CITY – Buot nga bakwion sa konseho ning dakbayan ang recognition, rekomendasyon og citation nga gihatag kang kanhi City PNP Director P/Col. Raul Supiter.
Kini human nga niadtong Martes atol sa sesyon, nagpasa ug urgent resolution ang Sangguniang Panlungsod alang sa maong tumong.
Nagkahiusa ang mga konsehal sa pahayag nga wala matud pa gihatagan ni Supiter og igong aksyon ang isyu kalabot sa kontrobersyal nga Police Paluwagan Movement.
Gikaingong gipagsadan ang mga sakop nga malambigit sa P2 billion investment scam nga sa pahayag sa mga nabiktimang pulis sa sulod pa mismo sa Camp Fermin Lira sa General Santos City Police Office nahitabo ang transaksyon.
Kahibaluan nga daghang pulis sa GSCPO matud pa ang nabiktima kung asa gitumbok sa pipila nga si Supiter ang usa sa opisyal nga nalambigit sa PPM scam.
Gitudlo usab ni Shiela Agustin nga gikanayong tigdawatan ug investment gikan sa mga recruiter nga may kasayuran ang naasoyng kanhi City Director kalabot sa maong scam.
Nasayran nga tungod niini, na-relieve si Supiter sa iyang pwesto kauban si P/Col. Manuel Lucban sa PRO-12 kung asa ang duha ka opisyal ang atua sa Camp Crame kauba ang lain pang mga pulis nga gitudlong nalambgit sa PPM scam.
