GENSAN – Nagpahimangno ang mga awtoridad sa General Santos City sa katawhan nga buot mobisita sa sementeryo nga siguraduhon una ang seguridad sa ilang mga panimalay aron malikayan ang posibleng pagpangawat o dautang hitabo samtang wala sila sa balay.
Sumala sa General Santos City Police Office (GSCPO), importante nga i-lock ang mga pultahan ug bintana, ug ayaw magbilin og mga butang nga mahalaga sa sulod sa balay.
Girekomenda usab nila nga ipahibalo sa silingan kung mobiya aron aduna’y magbantay sa palibot.
Gipasabot sa kapulisan nga matag Kalag-Kalag, daghang mga tawo ang mogawas aron mobisita sa sementeryo busa adunay posibilidad nga samantalahon kini sa mga kawatan.
Tungod niini, gipahimangnoan ang tanan nga magmatngon ug magtinabangay aron mapadayon ang kalinaw ug seguridad sa dakbayan.
Dugang pa sa GSCPO, magpabilin gihapon ang mga kapulisan sa pagpatrolya sa mga barangay aron masiguro nga malinawon ang pagsaulog sa Kalag-Kalag sa General Santos City.
