Dakong papel sa mga ginikanan ang paglikay sa mga kabatan-onan nga malambigit sa rambol ug uban pang kagubot sa komunidad.
Kini ang gibug-aton ni Barangay Captain Arthur Ryan Dupalco atol sa iyang panawagan sa mga ginikanan nga hugot nga bantayan ug sutaon ang kalihokan sa ilang mga anak, ilabi na panahon sa kagabhion.
Gihimo ang panawagan human sa pipila ka insidente sa rambol ug kagubot nga nalambigit ang mga kabatan-onan sa pipila ka barangay sa miaging mga adlaw.
Sumala ni Dupalco, dili lamang barangay ug kapulisan ang adunay responsibilidad sa pagmintinar sa kalinaw ug seguridad sa komunidad.
Matud niya, importante ang paggiya ug pagmonitor sa mga ginikanan aron mahibal-an kung asa moadto ang ilang mga anak ug kinsa ang ilang mga kauban.
Giawhag niini ang mga ginikanan nga mas hugot nga bantayan ang ilang mga anak, ilabi na kung gabii na, aron malikayan ang ilang pagkalambigit sa kagubot ug krimen.
