GENERAL SANTOS CITY – Padayon ang manhunt operation sa Glan Municipal Police Station batok sa tulo ka suspek nga gitudlong responsable sa pagdunggab-patay sa usa ka mag-uuma sa Glan, Sarangani.
Kahinumduman nga giila ang biktima nga si Ronillo Motoy, 42 anyos, Prk Malaumon, Brgy Mudan, Glan, Sarangani.
Sa impormasyon, kagahapon sa buntag nakaplagan sa nagpangalan ug Rafael Flores ang biktima sa sapa nga naligo sa kaugalingog dugo may samad dinunggaban sa likod.
Gilayon kining gidala sa balay-tambalanan, kung asa gideklara kining dead on arrival.
Sa imbestigasyon, matud ni PO3 Jay Cuico, miaging gabii una ang pagkakaplag sa nagkadugo nga biktima, nakig-inum pa kini kauban ang iyang anak ug laing tulo ka kainom.
Miuna matud pag uli ang iyang anak, kung asa nagkalalis matud pa ang biktima ug ang mga kainom, nga misangko sa pagpanunggab.
Human ang insidente, wala na hingkit-an ang tulo, hinungdan nga maoy gitudlong suspek sa pagpanunggab.
Padayong giimbestigan sa kapulisan ang insidente, kung asa mibalibad una nga ipagawas ang pangalan sa tulo suspek.
