GENERAL SANTOS CITY – Dead on the spot ang duha ka managsuon nga lalaki nga bag-ong laya pipila ka minuto lang human nagbayad ug piyansa sa San Isidro Police Station, human gipusil sa riding in tandem suspects.
Nahitabo ang insidente bandang alas-5:30 kagahapon sa hapon, sa may Nuñez St. Brgy San Isidro, kung asa ang mga biktima giilang sila si Jerwin Anog alyas Chiong, 40-anyos, ug si Anecito Anog alyas Toto, 47-anyos, pulos wala usay trabaho, ug residente Prk 13 Packing 1 Brgy Mabuhay ning siyudad.
Base sa inisyal nga imbestigasyon, mao pa lamang paggawas sa presinto sa duruha human nagbayad ug P240,000 alang sa temporaryong kagawasan, human masikop sa gipahigayong raid miaging bulan sa ilang panimalay, human malakip sa watchlist sa nahisgutang presinto.
Misakay matud pa sila sa usa ka tricycle kung asa may laing usa ka pasahero nga babaye, ug gisubay ang nahisgutang dalan dihang gisundan sa duha ka motorsiklo nga may sakay nga tulo ka suspek, ug pag-abot sa ngitngit nga bahin, gipahigayon ang pagpamusil sa mga biktima.
Ang duha pulos nakaangkon ug nagkadaiyang mga samad-pinusilan nga maoy hinungdan sa ilang hinanaling kamatayon.
Samtang ang mga suspek ang paspas nga misisbat.
Sa pagkakaron padayon pang giimbestigahan sa kapulisan ang nasampit nga insidente.
