Maisogon nga mitubag si Pope Leo XIV sa mga kritisismo ni Donald Trump samtang anaa siya sa iyang unang dakong pagbisita sa upat ka nasud sa Africa.
Gitawag ni Trump ang Santo Papa nga “terrible” ug “weak on crime” human kini mosinggit batok sa gubat sa US ug Israel kontra Iran ug sa mga polisiya sa imigrasyon sa administrasyon.
Bisan pa niini, giingon ni Pope Leo nga dili siya mahadlok ug magpadayon sa pagpahayag batok sa gubat ug karahasan, diin iyang gipasiugda nga ang mensahe sa Ebanghelyo nagpunting sa kalinaw.
Sa iyang biyahe padulong sa Algiers, iyang giingon nga daghan kaayong tawo ang nag-antos sa kalibutan ug kinahanglan ipadayon ang dayalogo ug hustong solusyon. Dugang pa niya, dili niya tan-awon ang iyang papel isip politikal kondili isip tigpahayag sa mensahe sa kalinaw sa Simbahan.
Samtang, daghang Katoliko ug mga obispo sa US ang midipensa sa Santo Papa ug mikondena sa mga pahayag ni Trump nga ilang gitawag og makapaluya ug dili angay batok sa lider sa Simbahang Katoliko.
