Narekord sa Guinness World Records ang pinakataas nga kahoy nga eskultura sa kalibotan nga gihimo sa tulo ka ‘Lithuanian craftsmen’.
Ang eskultura nga gitawag og “Eglė žalčių karalienė” adunay gitas-on nga 25.11 meters ug nahimutang sa Puntuko Kaimas sa Lithuania.
Ang mga naghimo niini mao sila Valerij Kunigel, Deividas Tarulis ug Virginijus Tarulis, nga kapin usa na ka dekada nga nagbuhat og nagkalain-laing kahoy nga eskultura.
Aron matukod ang maong rekord, ilang gihimo sa workshop ang walo ka bahin sa eskultura gamit ang mga punoan nga ‘oak’, nga dayon gidala sa lugar ug gitigom gamit ang crane.
Walay gigamit nga suportang estruktura sa sulod sa eskultura, samtang mga sobra-sobra sa kahoy nga gipangsumpay ug glue lamang ang gigamit sa pagkonektar sa mga bahin niini.
Matud sa mga naghimo, kapin usa ka tuig ang ilang gigahin sa proyekto ug dako nga pailub ug paningkamot ang gikinahanglan aron mahuman kini.
Ang maong eskultura opisyal nga nakarekord isip ‘tallest wooden sculpture’ sa Guinness World Records nga misukod og 25.11 meters ang gitas-on.
