GENERAL SANTOS CITY | Gihunong na sa LGU Maasim ang construction sa Maasim resettlement project sa National Housing Authority human nahugno ang lugar nga gipatukuran sa mga balay. Kini human giangkon ni Mayor Xyrex Pacquiao nga lima na lamang ang nahibilin sa dise otso ka balay nga gipatukod sa lugar human nahugno ang yuta. Matud niini nga dali gikontak ang taga Mines and Geosciences Bureau sa DENR ug gidala sa lugar ug gisusi ang panghitabo.
Aron makita ang palibut nagpalupad pa ug drone ang munisipyo ug didto nakita ang mga rason sa pagkahugno sa yuta. Sa ibabaw matud pa sa gi construct nga mga balay may tubig nga gaagas nga mipadulong sa mga housing unit nga nahimong hinungdan sa pagkahugno sa lugar. Gumikan matud pa sa maong tubig gipahumok niini ang lugar hinungdan sa pagkahulpa sa yuta.
Una matud pa nagsugod ang construction sa lugar nagpahigayon ug soil testing ug migawas nga gahi ang yuta human gigamitan ug jackhammer. Usa usab sa gitudlong hinungdan sa pagkahugno may giirog matud pa nga dakong bato ang construction nga naa sa ubos nga bahin nga mipahuyang sa yuta hinungdan sa pagkahugno.
