GENERAL SANTOS CITY – Aminado si Atty Rey Cartojano, co-anchor sa programang Duralez Sedlex sa Bombo Radyo, nga luyo nga masulti nga medyo nakab-ot ang hustisya human mahukman nga guilty sa Sandiganbayan si kanhing First Lady ug kasamtangang Ilocos Norte Rep. Imelda Marcos sa pito ka ihap sa pagsupak sa Anti-Graft and Corrupt Practices Act, apan layo pa gihapon ang posibilidad nga mapabilanggo kini.
May kalabutan kini sa kinawat nga kabtangan sa pamilyang Marcos, nga matud pa anaa sa kinatibuk-an sa lima ngadto sa 10 ka bilyones dolyares, nga susama sa P500 bilyon, kung asa gikabutyag nga anaa sa 1/3 pa lang ang nakuha balik sa gobyerno.
Apan matud ni Atty Cartojano, may mga legal remedy pa nga pwedeng himuon ang kampo ni Marcos, kung asa mahimo siyang mu-file ug motion for reconsideration.
Samtang kon unsa man ang mamahimong desisyon sa Sandigan, pwede pa usab niyang ipasaka sa Korte Suprema.
Hinungdan nga kon ibase sa sistema sa proseso, posibleng layo pa agyud ang posibilidad nga mapabilanggo ug mahimo pa niining mahinayon ang pagpapili sa midterm elections sunod tuig.
Samtang, kon ugaling hingpit man gyud nga makonbikto, kung asa matud ni Atty Cartojano dako ang posibilidad nga mahitabo una mahuman ang termino ni Pangulong Duterte, posibleng hatagan usab kini sa chief executive ug presidential pardon.
Gisusama pa ni Atty Cartojano ang maong sirkumstansya sa nahitabo kanilang kanhing Pangulong Erap Estrada nga nakonbikto apan gihatagan ug presidential pardon, ug karon nakahimo pa sa pagpapili sa laing posisyon sa gobyerno, ug maoy kasamtangang mayor sa Maynila.
