GENSAN – Dead on arrival nga niaabot sa balay tambalanan ang usa ka lalaki nga giingong miyembro sa sa gun-for-hire human kini gipusil sa ulo samtang naglingkod sa iyang motorsiklo sa Purok 6, Salazar Compound, Barangay Conel, General Santos City alas-7 kagabii .
Ang biktima giila sa kapulisan nga si Daryl Petson Hequin, hamtong ug lumolupyo sa maong barangay. Sumala sa imbestigasyon sa Police Station 9 nga gipangulohan ni Police Major Lemuel Enrijo, nakalingkod lang ang biktima sa kilid sa dalan sakay sa iyang motorsiklo dihang kalit siyang giatake ug gipusil diretso sa ulo.
Sa crime scene, narekober sa mga otoridad ang usa ka .38 caliber revolver nga gituohang armas sa biktima.
Dugang pa nga , posibleng nalambigit si Hequin sa mga insidente sa pagpamusil ug pagpangawat sa dakbayan.
Ang armas nga nakuha sa lugar ipailawom sa ballistics examination aron masuta kung kini ba gigamit sa ubang krimen.
Sa kasamtangan nagpadayon ang imbestigasyon sa kapulisan samtang gipalig-on ang presensya sa mga kapulisan sa lungsod aron malikayan ang susamang kalihokan sa krimen
