Nag-antos og kasakit sa mga bukog si Kris Aquino samtang nag-film sa iyang comeback content, bisan pa sa iyang mga autoimmune disease.
Gibutyag kini sa iyang suod nga higala nga si Loi Villarama, kinsa usa sa nakasaksi sa kalisod nga giatubang ni Aquino atol sa shooting.
Matud ni Villarama, namatikdan niya nga naghubag ang mga bitiis ni Aquino ug grabe usab ang kasakit sa iyang mga bukog tungod sa rheumatoid arthritis. Nakita pa niya ang pag-usli sa mga bukog sa tuhod ni Aquino tungod sa paghubag.
Sa sinugdanan, okay pa kuno ang kahimtang ni Aquino, apan samtang nagkadugay ang shooting ug gikapoy siya, mas namatikdan ang mga sintomas sa iyang sakit.
Bisan pa niini, matud ni Villarama, wala mireklamo si Aquino ug nagpabiling positibo bisan pa sa kasakit ug kakapoy.
Sa dihang anaa na siya atubangan sa kamera, dili na kuno makita nga nag-antos siya og kasakit, ug gipakita niya ang iyang pagka-propesyonal isip artista ug host.
Dapat unta hangtod alas-12 sa tungang gabii ang shooting ni Aquino, apan nahuman kini alas 1:30 sa kaadlawon nga wala gihapon siya mireklamo, sumala ni Villarama.
Gipahayag usab ni Villarama ang iyang kalipay sa pagbalik ni Aquino sa spotlight ug nag-ampo alang sa padayon niyang pagkaayo.
