Gibutyag sa Department of Health (DOH) nga mikunhod na ang kaso sa leptospirosis sa nasud apan nagpabilin gihapon nga aktibo ang 49 ka fast lanes para sa mga pasyente sa lain-laing dapit sa Pilipinas.
Matud sa DOH, gikan sa halos 200 ka kaso nga natala matag adlaw sa miaging Agosto 3 hangtod 9, nga miubos na lang sa 10 ka kaso matag adlaw niadtong Agosto 10 hangtod 14.
Gikan Hunyo 8 hangtod Agosto 14, nakaabot sa 3,752 ang total nga kaso sa leptospirosis nga natala sa nasud.
Gihangyo usab sa ahensya ang publiko nga dayon magpa-check up gilayon sa mga health centers o ospital kung sila nabasa o na-expose sa baha ug lapok atol sa ting-ulan aron masusi ang ilang kahimtang ug hatagan sa hustong tambal.
Ang leptospirosis usa ka bacterial infection nga makuha pinaagi sa tubig nga natakdan sa ihi sa mga hayop nga positibo sa sakit, kasagaran mga ilaga.
Kini makahatag ug hilanat, kasakit sa kalawasan, ug sa grabe nga kaso, makadaot sa internal organs o makamatay kung dili tambalan dayon.
