Imbes nga mahimong malipayon ang kasal sa bride ug groom sa Amlan, Negros Oriental, napuno kini ug pagkadismaya ug kapungot tungod sa giingong pagsinuplado sa pari nga nag-officiate sa kasal.
Kini tungod nga samtang nagamartsa pa lang ang bride padulong sa altar, nagsugod na sa iyang misa ang pari rason nga halos nagdagan na lang ang bride padulong sa altar.
Ang gikasal mao silang Janine Sagario ug Jove Sagario.
Sumala pa sa mga nagtambong sa kasal, human ang seremonya, wala man lang nagsulti ang pari ug “Kiss the Bride” ug nag-walk out gilayon kini pagawas sa simbahan.
Nakahilak usab ang couple tungod sa gipakitang taras sa pari nga nagguba sa ilang moment.
Nagpaklaro usab ang bride kalabot sa alegasyon nga na-late sila sa ilang schedule rason kun ngaa nangasaba ang pari.
Sumala sa bride, una nga naka-schedule ang ilang kasal kaniadtong Hunyo 8, alas-otso sa buntag.
Apan sumala sa iyaha, kaniadtong Hunyo 7 sa gabie, gipahibalo sila sa usa sa ilang sponsors nga gi-reschedule sa simbahan ang ilang kasal kung asa imbes nga alas 8:00 sa buntag, gihimo kini nga alas 9:30 sa buntag.
Pamahayag niya, kaniadtong Hunyo 8, alas 9:00 sa buntag pa lang dihang nag-abot sila sa simbahan.
Didto na nangasaba ang mga staff sa simbahan ug gibutyag nga late sila sa schedule nga alas 8:00 sa buntag.
Dugang niya, wala na siya nakatubag sa staff ug nidiretso na lang kini sa entrance sa simbahan.
Sa dihang anaa pa lang kini sa pultahan, didto na nagsugod ang pari sa seremonya.
