GENERAL SANTOS CITY – Kahapong adlawa hingpit ng nagretiro si Brig Gen James Gulmatico kung ibase sa petsa sa iyang adlaw natawhan, kini human gipahigayon ang retirement program kaniadtong adlaw nga byernes sa Camp General Paulino T. Santos sa Police Regional Office 12.
Luyo sa maong sitwasyon wala gihapon mahibaw-an kung si kinsa ang muhulip kang Gulmatico nga nagretiro nga OIC aron dumalahan ang kapulisan sa rehiyon dose.
Nasuta nga si Gulmatico ang nagdumala sa Police Regional Office 12 sulod lamang sa mukapin tulo ka bulan hinungdan nga nagpabilin kini nga OIC.
Mismong si Police Lt. General John Dubria, acting Deputy Chief for Operations sa PNP nga nagrepresenta kang PNP Chief Police Director General Francisco Marbil ang wala masayod kung si kinsa ang musunod nga labaw sa PRO 12.
Human nanamilit si Gulmatico gibutang isip caretaker sa kapulisan sa rehiyon si Police Col. Arnold Santiago, Deputy Regional Director for Operations hangtud may mupuli nga bag-ong labaw sa kapulisan.
Una ng gidungog ang pangalan ni Brig Gen Aden Lagradante ang kanhi labaw sa kapulisan sa syudad apan wala pay pormal nga deklarasyon ang Camp Crame niini.
