Gipahibalo sa Philippine National Police (PNP) nga ilang ipakatap ang 37,750 ka mga pulis ubos sa Oplan Balik-Eskwela 2025–2026, sa tibuok nasod isip kabahin sa luwas nga pag-abli sa klase karong Lunes, Hunyo 16, 2025.
Matod sa PNP, mokabat sa 45,974 ka mga tunghaan ang bantayan sa mga pulis nga naglakip sa 38,292 ka pampublikong tunghaan ug 7,682 ka pribadong tunghaan.
Adunay usab 5,079 ka police assistance desk nga gidumala sa 10,759 ka mga pulis, samtang 10,687 ang mopahigayon og mobile patrols uban ang 16,366 ka foot patrols.
Sa datus sa Kapolisan, ang kinadak-ang deployment sa mga pulis anaa sa Central Visayas nga adunay 7,366 ka pulis, Metro Manila: 4,323, Bicol Region: 2,962, Eastern Visayas: 2,376, ug Bangsamoro Region: 2,898 police officers alang sa 657 ka mga tunghaan.
Una niini, si PNP Chief Gen. Nicolas Torre III niingon nga ang kaluwasan sa mga estudyante, magtutudlo, ug kawani sa eskwelahan maoy ilang tumong sa pagsugod sa klase.
Samtang, matod sa PNP, sa kinatibuk-an malinawon ang pagpangandam sa pagbukas sa klase sa tibuok nasod.
