Misaka na sa kapin 2-mil ka mga tawo ang gituohang nalubong nga buhi sa landslide nga nahitabo sa Kaokalam village, Enga Province, Papua New Guinea ning nakalabayng semana.
Kini ang gikumpirma sa National Disaster Centre sa nasangpit nga nasod.
Sumala sa mga otoridad nga naglisod sila pagkalot sa mga natabunan tungod 10 metros ang gilubngan sa mga nahisgutan, dugangan pa kini sa kalisod sa dalan paingon sa nasangpit nga bario.
Gikahadlokan usab sa mga rescuers ang inanay nga pagdahili sa nahabiling habog nga yuta ug mga bato sa Mount Mungalo tungod mamahimo pa usab kining mudahili ug mutabon na usab sa nasangpit nga lugar.
Nangayo na karon og tabang ang panggamhanan sa Papua New Guinea sa mga International Organizations alang sa hinanaling pagrescue sa mga biktima.
Sumala sa taho nga aduna matud pay kapin sa 4-mil ka mga tawo ang namuyo sa maong dapit.
Halos katunga usab sa mga nahisgutan ang nalubong human wala sila makabantay sa nahitabong landslide tungod natigayon kini sa alas 3 ang takna sa kaadlawon.
Kahibaloan nga nahimutang ang Kaokalam Village kilid lang sa Mount Mungalo, rason nga target kini sa pagdahili sa mga huyang nga yuta sa maong bukid.
