GENERAL SANTOS CITY – Mukabat sa 75, 545 ka bata ang target nga mabakunahan dinhi sa dakbayan.
Matud pa kang City Health Officer Dr. Jett Oco, hugot nga gipahigayon sa ilang buhatan ang house to house campaign atol sa ‘Sabayang Patak Kontra Polio’.
Adunay 500 ka vaccination teams nga may tulo ka miembro( usa ka bakunador nga mga lisensyadong doktor, nurse, midwife, medtech o pharmacists, usa ka recorder nga gikan sa Barangay health worker og may usa ka ‘ guide’.
Gibutyag ni Dr. Oco nga mahimo usab nga magpabakuna ang mga ginikanan sa ilang mga anak sa day care centers, private hospital, lying inns, Rural health units kon health centers sa barangay.
Sa pahayag niini, duha ka patak lang sa polio vaccine ang ihatag sa bata og dili tusok sa dagum bisan unsa man vaccination status hinungdan nga mas sayon nga ipahigayon ang pagbakuna.
Sumala kang Dr. Oco, hugot ang ilang mamahimong monitoring matag adlaw sa dagan sa immunization program dinhi sa dakbayan.
Sa pahayag ni Dr. Oco nga aduna silay gimuntar nga Operation center sa City Health office kung asa maghatag ug daily reporting kabahin sa kampanya kontra polio.
Gikabutyag nga kapin 18,000 na ka bata sa GenSan nabakunahan sa unang adlaw sa Sabayang Patak Kontra Polio.
Human ang pagpatulo og polio vaccine ginabutangan og indelible ink ang kumingking sa bata isip pamatuod nga sila nabakunahan.
