Gipahamtang sa Sandiganbayan Third Division na mabilanggo 0si kanhi Autonomous Region in Muslim Mindanao (ARMM) governor Nur Misuari ug unom pa nga sad-an sa kasong graft sa mga ghost purchases nga P77 milyones nga balor sa learning tools gikan niadtong 2000 ngadto sa 2001.
Kini nahitabo niadtong gobernador pa kini sa ARMM. Sa desisyon sa mga mahistrado, guilty beyond reasonable doubt si Misuari sa duha ka ihap sa kasong graft.
Gawas kang Misuari, guilty beyond reasonable doubt usab ang desisyon sa mga mahistrado sa kauban nga mga akusado niini nga nailhan nga silang Leovigilda Cinches, Pangalian Maniri, Sittie Aisa Usman, Alladin Usi, Nader Macagaan ug Cristeta Ramirez.
Gipahamtangan usab ang mga nahisgutan ug unom hangtod walo ka tuig nga pagkabilanggo.
Pagkahuman niini, diskwalipikado usab ni Misuari nga muhupot ug unsa mang posisyon sa gobyerno.
Samtang abswelto usab ang tanang akusado sa kasong malversation nga gipasaka batok kanila.
Wala makatambong si Misuari sa promulgation apan gibasahan siya ug desisyon pinaagi sa video conferencing.
Usa pa ka laing akusado nga si Cinches ang wala usab makatambong tungod edaran na og may sakit sama sa manifestation sa iyang abogado.
